Hæfnimarkmið íslensku á yngsta stigi





Talað mál, hlustun og áhorf 
í lok 4. bekkjar
Að nemandi geti:
  • Beitt skýrum og áheyrilegum framburði,
  • tjáð sig með aðstoð leikrænnar tjáningar frammi fyrir hópi og staðið fyrir máli sínu,
  • sagt frá eftirminnilegum atburði og lýst ákveðnu fyrirbæri, endursagt efni sem
         hlustað hefur verið á eða lesið,
  • hlustað og horft með athygli á upplestur, leikið efni, ljóð og söngva og greint frá
         upplifun sinni,
  • nýtt sér og endursagt efni á rafrænu formi,
  • átt góð samskipti, hlustað og sýnt kurteisi.






Lestur og bókmenntir
í lok 4. bekkjar
Að nemandi geti:
  • Beitt aðferðum við umskráningu hljóða og stafa þannig að lestur verði lipur og skýr,
  • nýtt góðan orðaforða við að skilja texta og ráðið í merkingu orðs út frá samhengi,
  • tengt þekkingu sína og reynslu við lesefni í því skyni að ná merkingu þess,
  • valið sér lesefni eftir áhuga og þörf og lesið sögur, ljóð og fræðandi efni, sem hæfir lestrargetu, sér til ánægju og skilnings,
  • lesið ævintýri, sögur og ljóð ætluð börnum,
  • beitt hugtökum eins og persónu, söguþræði, umhverfi og boðskap,
  • beitt fáeinum algengum hugtökum í bragfræði svo sem rími, kvæði, vísu og ljóðlínu,
  • aflað sér upplýsinga úr ýmsum tiltækum gagnabrunnum, svo sem bókum og á rafrænu formi,
  • lesið úr táknmyndum og myndrænu efni, svo sem einföldum skýringarmyndum, kortum og myndritum, valið bók eða annað lesefni og lesið sér til ánægju.




Ritun
í lok 4. bekkjar
Að nemandi geti:
  • Dregið rétt til stafs og skrifað skýrt og læsilega,
  • nýtt í ritun þekkingu á grunnþáttum í byggingu texta, svo sem upphafi, meginmáli og niðurlagi,
  • samið texta frá eigin brjósti, svo sem sögu, frásögn, ljóð eða skilaboð,
  • beitt einföldum stafsetningarreglum og notað tiltæk hjálpargögn við hæfi,
  • nýtt sér fyrirmyndir í ritun, svo sem af lestri bóka, blaða eða rafræns efnis,
  • skrifað texta á tölvu og beitt einföldustu aðgerðum í ritvinnslu,
  • skrifað og leyft öðrum að njóta þess með upplestri höfundar eða lestri lesanda.






Málfræði
í lok 4. bekkjar
Að nemandi geti:
  • Beitt töluðu máli og rituðu af nokkru öryggi og ræður yfir orðaforða og málskilningi sem hæfir þroska,
  • þekkt og fundið helstu einingar málsins, svo sem bókstafi, hljóð, orð, samsett orð og málsgrein,
  • raðað í stafrófsröð og gert sér grein fyrir notagildi þess við leit og skipulag,
  • gert sér grein fyrir mismunandi hlutverki nafnorða, lýsingarorða og sagnorða,
  • leikið sér með ýmis einkenni tungumálsins, svo sem margræðni orða og fundið kyn og tölu,
  • búið til málsgreinar og ráðið við að greina málsgreinar í eigin texta,
  • greint mun á samnöfnum og sérnöfnum og m.a. bent á þau í eigin texta,
  • leikið sér með orð og merkingu, svo sem með því að ríma, og fara í orðaleiki,
  • gert sér grein fyrir markmiði þess að læra íslenska málfræði.